Լսել։ Ուսուցիչը կներկայացնի Մարտիրոս Սարյանի կյանքի հիմնական փաստերը. մանկություն, նկարչական առաջին փորձեր, մանկուց մեծ սերը բնության հանդեպ, գեղեցկության յուրահատուկ ընկալումը, մոսկովյան ուսանողական տարիներ, ճանապարհորդությունը դեպի Թուրքիա, Պարսկաստան, Եգիպտոս, «Գիշերային բնանկար: Եգիպտոս» կտավի ծնունդը, Հայաստանի զինանշանի ու դրոշի ստեղծումը, Փարիզում նկարների ցուցահանդեսի բացում, տուն-թանգարանի բացում։ Ապա կդիտեն Սարյանի ուշագրավ նկարները տեսանյութով («Գարուն», «Ինքնադիմանկար», «Լուսնկա գիշեր», «Նատյուրմորտ», «Ծաղիկներ քաղաքիկից», «Ծաղկող ծառերը», «Արագած») https://www.youtube.com/watch?v=x8fQlkFQpgM (20 րոպե)։
Կարդալ։ Մի առիթով Մարտիրոս Սարյանը ասել է. «Ինչ որ նկարում եմ` Հայաստան է դուրս գալիս»։ Ուսուցիչը կներկայացնի, որ Սարյանը ուսումնասիրել ու ճանաչել է հայրենի բնությունը: Լեռների ու ձորերի, հարթավայրերի ու հովիտների, արևի լույսով ողողված գույների մեջ Սարյանը խորապես ընկալել է հայկական լեռնաշխարհի բնական երանգները: Ապա աշակերտների հետ կառանձնացնեն «Հայաստան» նկարի դետալները (արև, լեռ, հարթավայր, ծառ, թուփ), կփորձեն սարյանական գույները փոխարինել բառերի, զգալ գույնի ու բառի հարազատությունն ու ներդաշնակությունը http://www.gallery.am/hy/database/item/210/։ Աշակերտների հետ կընթերցեն Սարյանի ուշագրավ մտքերը հայրենիքի, արվեստի և իր նկարների ստեղծման պատմության մասին (25 րոպե)։
Հայրենիքի մասին։ Առանց հայրենիքի, առանց հայրենիքի հանդեպ սիրո մարդը չի կարող գտնել ինքն իրեն, նա չի կարող գտնել իր հոգին:
Արվեստի մասին։ Արվեստը պետք է կյանքի, պայքարի կոչի մարդուն, հավերժական, համամարդկային թեմաներով հաղորդի նրան հույս ու հավատ, այլ ոչ թե ճնշի ողբերգական թեմաների նկարագրությամբ:
«Գիշերային բնանկար: Եգիպտոս» կտավի ստեղծման պատմությունը։ Ուղեկցիս գյուղում էինք: Քայլում էինք նեղլիկ փողոցներով: Փոքրիկ տնակների պատերին ստվերներ էին ձգել արմավենիները: Դա մի հրաշք էր գույների և ձևերի իր նրբություններով։ Հենց այդ տպավորությամբ էլ նկարել եմ «Գիշերային բնանկար: Եգիպտոս» աշխատանքը:
Քննարկում
- Ըստ ներկայացված նկարաշարերի՝ պատմի՛ր Սարյանի մասին (10 րոպե)։
- Ո՞ր գույնն է գերիշխում Սարյանի նկարներում և ինչու՞ (10 րոպե)։
- Նայելով «Հայաստան» նկարին՝ դետալները բնորոշի՛ր մեկ բառով (10 րոպե)
Տնային հանձնարարություն
- Պատկերի՛ր քո հայրենիքն այնպիսին, ինչպիսին դու կցանկանաս տեսնել։
- Քո նկարը բնութագի՛ր 25-30 բառերի շրջանակում։