Տնային հանձնարարությունների ստուգում։ Երեխաները կներկայացնեն իրենց տնային հանձնարարությունները։ Աշակերտները կվերհիշեն Գրիգոր Խանջյանի գորգանկարները, ինչպես նաև կստուգվեն գրավոր հանձնարարությունները, որոնք պետք է նախապես տեղադրվեն google classroom հավելվածում (5 րոպե)։
Լսել։ Ուսուցիչը կծանոթացնի Փանոս Թերլեմեզյանի կյանքի հիմնական դրվագներին. մանկությունը Վանում, ճամփորդություն դեպի Պարսկաստան և Թբիլիսի, ուսումնական տարիներ Սանկտ Պետերբուրգում, ձերբակալություն և աքսոր, ուսանողական տարիները Փարիզում, մտերմությունը Կոմիտասի հետ, Վանի հերոսամարտի ղեկավար։ Կցուցադրվեն նրա հայտնի նկարները՝ «Տաթևի վանքը», «Վանա լիճը և Սիփան սարը Կտուց կղզուց», «Աշունը հին Երևանում», «Սևանի ափերը», «Սանահինի վանքի գավիթը»։ Աշակերտները կդիտեն Թերլեմզյանին նվիրված տեսանյութ https://www.youtube.com/watch?v=leuMU7orpak (20 րոպե)։
Կարդալ։ Երեխաները կընթերցեն Տաթևի վանքի պատմությունը, կդիտեն տեսանյութ նրա մասին https://www.youtube.com/watch?v=RD_5_k0bAUM, կհամեմատեն այն Թերլեմեզյանի «Տաթևի վանքը» կտավի հետ http://www.gallery.am/hy/database/item/138/, կփորձեն նկարչի գույները փոխարինել բառերի՝ բացահայտելով գույնի և բառի ներդաշնակությունը (20 րոպե)։
Տաթևի վանքը գտնվում է Սյունիքի մարզի Տաթև գյուղի հարավում: Այն հիմնադրվել է 4-րդ դարում, եղել է համահայկական մշակութային կենտրոն, որտեղ գործել է Տաթևի համալսարանը։ Վանքին կից եղել են մատենադարանն ու մանրանկարչության դպրոցը: Վանքի բակի կենտրոնում կառուցվել է ճոճվող հուշասյունը՝ «Գավազանը», որը բազմաթիվ երկրաշարժերից հետո պահպանվել է անխաթար։
Վանքի անվան ծագման մասին գեղեցիկ մի լեգենդ է մեզ հասել: Երբ վանքը կառուցող վարպետը ավարտել է իր աշխատանքը, նա խնդրել է Աստծուն իրեն թևեր տալ, որպեսզի նա երկնքից տեսնի այս գեղեցկությունը: Աստված լսել է նրա խնդրանքը և կատարել այն: «Տաթև» նշանակում է «տուր թևեր»: Մոտենալով վանքին՝ հասկանում ես, թե ինչու է հենց այդ անվանումը: Չորս կողմից անդունդներով շրջապատված վանքը, կարծես ճախրում է կիրճի վրա:
Քննարկում
- Ի՞նչ գունային ներկապնակ է օգտագործել Թերլեմեզյանը վանքն ու հարակից տեսարանները նկարելիս (10 րոպե)։
- Ո՞ր գույնն է գերիշխում «Տաթևի վանքը» նկարում (10 րոպե)։
- Առաձնացրո՛ւ նկարի դետալները, բնութագրի՛ր (10 րոպե)։
Տնային հանձնարարություն
- Պատկերի՛ր Տաթևի վանքը այնպիսին, ինչպիսին դու կցանկանաս տեսնել։
- Քո նկարը բնութագի՛ր 25-30 բառերի շրջանակում։