Տնային հանձնարարությունների ստուգում։ Աշակերտները կներկայացնեն իրենց տնային հանձնարարությունները։ Կամփոփենք նախորդ դասը, երեխաները կարտասանեն Թումանյանի «Կաքավի գովքը» բանաստեղծության նախընտրելի քառատողը, ինչպես նաև կստուգվեն գրավոր հանձնարարությունները, որոնք պետք է նախապես տեղադրվեն google classroom հավելվածում (15 րոպե)։
Լսել։ Ոսուցիչը ֆիլմ-տեսաշարի միջոցով կներկայացնի Պարույր Սևակի կյանքի հետաքրքիր դրվագները, կընթերցեն նրա հայրենասիրական աֆորիզմները, կլսեն Սևակի «Քիչ ենք, բայց հայ ենք» բանաստեղծությունը Վլադիմիր Աբաջյանի կատարմամբ` ուշադրություն դարձնելով բառերի ճիշտ արտասանությանն ու առոգանությանը https://www.youtube.com/watch?v=Sh4Dy-aJ5Wg&t=11s (15 րոպե)։
Ընթերցում։ Երեխաները կընթերցեն Պարույր Սևակի «Քիչ ենք, բայց հայ ենք» բանաստեղծությունը, կառանձնացնեն դժվար և իմաստով անծանոթ բառերը։ Ապա ուսուցիչը նկարաշարերի միջոցով կներկայացնի բանաստեղծության մեջ տեղ գտած հայկական խորհրդանիշ տեղանուն անձնանունները՝ Արարատ, Սևան լիճ, Նարեկացի և Սասունցի Դավիթ, կզրուցեն այդ թեմայի շուրջ (15 րոպե)։
Մենք քիչ ենք‚ սակայն մեզ հայ են ասում։
Մենք մեզ ո՛չ ոքից չենք գերադասում:
Պարզապես մենք էլ պիտի ընդունենք‚
Որ մե՛նք‚ միայն մե՜նք Արարատ ունենք‚
Եվ որ այստեղ է՝ բարձրիկ Սևանում‚
Երկինքը իր ճիշտ պատճենը հանում:
Պարզապես Դավիթն այստեղ է կռվել:
Պարզապես Նարեկն այստեղ է գրվել:
Պարզապես գիտենք ժայռից վանք կերտել‚
Քարից շինել ձուկ‚ և թռչուն՝ կավից‚
Ուսուցմա՛ն համար և աշակերտե՜լ
Գեղեցկի՛ն‚
Բարո՛ւն‚
Վսեմի՛ն‚
Լավի՜ն...
Մենք քիչ ենք‚ սակայն մեզ հայ են ասում:
Վարժություններ։
-
Նշված հարցերի միջոցով պարզել աշակերտների զգացմունքները հայ ժողովրդի և Հայաստանի հանդեպ (10 րոպե)։
-
Ի՞նչ եք տեսնում
-
Ի՞նչ եք զգում
-
Ի՞նչ եք լսում
-
Ի՞նչ եք մտածում
-
Ըստ բանաստեղծության՝ ո՞ր հատկանիշներն են բնորոշ հայ ժողովրդին (10 րոպե)։
-
Բարձր, գեղեցիկ, վսեմ, լավ բառերով կազմել բառակապակցություններ (10 րոպե)։
Տնային հանձնարարություն
-
Սահուն առոգանությամբ ընթերցել բանաստեղծությունը, նախընտրելի հատվածը՝ անգիր։
-
Կազմել նախադասություններ հայուհի, հայություն, հայկական, հայախոս բառերով։
-
Ի՞նչ է հայրենիքը քեզ համար, փորձի՛ր վերաշարադրել 25-30 բառերի շրջանակում։
Բառարան
Գերադասել - prefer -предпочитать
Պատճեն - copy - копия
Ժայռ - rock - скала
Վանք - monastery - монастырь
Քար - stone - камень
Շինել - build - строить
Ձուկ - fish - рыба
Կավ - clay - глина
Վսեմ- sublime - возвышенный
Աշակերտել - learn - учиться